ഇന്ത്യാവിഷനെ കേരളത്തിലെ വാര്ത്താമാധ്യമങ്ങളില് ഒന്നാം സ്ഥാനത്തെത്തിച്ച നികേഷ് കുമാര് തന്റെ പുതിയ ചാനലിന് പേരിട്ടു. ‘റിപ്പോര്ട്ടര്’. സമ്പൂര്ണ വാര്ത്താ ചാനല് ആയിരിക്കും റിപ്പോര്ട്ടര്. എന്നാല് എല്ലാ മേഖലകളെയും സ്പര്ശിക്കുന്ന തരത്തിലുള്ള സമഗ്രമായ വീക്ഷണം ഈ ചാനലിനുണ്ടായിരിക്കും.
റിപ്പോര്ട്ടറിനായി കേന്ദ്ര സര്ക്കാരിന്റെ ലൈസന്സ് നേടിയെടുക്കാനുള്ള ശ്രമം തുടരുകയാണ്. ആദ്യം പറഞ്ഞുകേട്ടതുപോലെ വന് ബിസിനസ് ഗ്രൂപ്പുകളായിരിക്കില്ല ഈ ചാനലിന് പിന്നില്. ‘എന്തായിരിക്കണം ഒരു മീഡിയ’ എന്ന് വ്യക്തമായ അവബോധമുള്ള, വിദേശ ഇന്ത്യക്കാര് ഉള്പ്പടെയുള്ളവരുടെ കൂട്ടായ്മയിലായിരിക്കും ‘റിപ്പോര്ട്ടര്’ പ്രവര്ത്തനം ആരംഭിക്കുക.
വാര്ത്തകള് വെറുതെ അവതരിപ്പിച്ച് കൈയൊഴിയുന്ന പതിവ് അവസ്ഥയെ മാറ്റിമറിക്കാനായിരിക്കും റിപ്പോര്ട്ടറിലൂടെ ശ്രമിക്കുകയെന്ന് നികേഷ്കുമാര് പറയുന്നു. പ്രശ്നങ്ങള് ഏറ്റെടുക്കുകയും ജനപങ്കാളിത്തത്തോടെ പരിഹരിക്കാന് ശ്രമിക്കുകയും ചെയ്യും. സമൂഹത്തിലെ വിഷയങ്ങളില് ശക്തമായി ഇടപെടും. ചാനലിന്റെ വെബ്സൈറ്റിലും പുതുമയുള്ള വാര്ത്തകളും അറിവുകളും ലഭ്യമാക്കും. ഒരു സോഷ്യല് നെറ്റുവര്ക്കിംഗ് സൈറ്റ് പോലെ ചാനലും വെബ്സൈറ്റും മാറ്റിത്തീര്ക്കും - നികേഷ് അറിയിക്കുന്നു.
ചെലവ് വളരെക്കുറഞ്ഞ ചാനലായിരിക്കും റിപ്പോര്ട്ടറെന്നും നികേഷ് പറയുന്നു. എന്നാല് സാങ്കേതികവിദ്യയുടെ കാര്യത്തില് മുന്നില്ത്തന്നെയായിരിക്കും. അഴിമതിക്കും പരിസ്ഥിതി നശീകരണത്തിനും വികസന വിരുദ്ധ നയങ്ങള്ക്കുമെതിരെ ശബ്ദിക്കുന്ന ചാനലായിരിക്കും റിപ്പോര്ട്ടര്. സിറ്റിസണ് ജേര്ണലിസത്തിന്റെ പുതിയ മുഖവും ഈ ചാനലിലൂടെ കാണാനാവും.
*
*
*
